सत्तेची नशा देश उध्वस्त करते ; उद्धव ठाकरेंचा भाजपवर हल्लाबोल

Santosh Gaikwad April 16, 2023 11:19 PM

नागपूर : भाजपचा बालेकिल्ला असलेल्या नागपूरमध्ये महाविकास आघाडीची वज्रमुठ सभा पार पडली. या सभेत माजी मुख्यमंत्री उद्धव ठाकरे यांनी भाजपवर जोरदार टीका केली. देशाचे गृहमंत्री अमित शाह, मुख्यमंत्री एकनाथ शिंदे उपमुख्यमंत्री देवेंद्र फडणवीस यांच्यावर जोरदार टीका केली.

महाराष्ट्र भूषण पुरस्कार सोहळ्याचा धागा पकडत ठाकरे म्हणाले, देशातील गल्लीबोळात घराणेशाही बोलणाऱ्या गृहमंत्र्यांना समाजसेवा करणाऱ्या घराण्यासमोर झुकावं लागलं. आप्पासाहेब धर्माधिकारींचे काम मोठं आहे. ते व्यसनमुक्तीचे काम करतात. दारूची नशा घर उद्ववस्त करते, सत्तेचे व्यसन देश उद्धवस्त करते अश्या शब्दात उद्धव ठाकरे यांनी  भाजपवर निशाणा साधला.

नागपूर येथे झालेल्या माविकास आघाडीच्या वज्रमुठसभेत राष्ट्रवादीचे नेते विरोधी पक्षनेते अजित पवार, प्रदेशाध्यक्ष जयंत पाटील,काँग्रेसचे प्रदेशाध्यक्ष नाना पटोले, माजी मुख्यमंत्री पृथ्वीराज चव्हाण, माजी मंत्री अनिल देशमुख, बाळासाहेब थोरात, सुनील केदार आदी मान्यवर उपस्थित होते.

मुख्यमंत्री शिंदे हे अलीकडेच अयोध्या दौऱ्यावर गेले होते. यावर हल्लाबोल करत उद्धव ठाकरे म्हणाले की, अयोध्येला मीसुद्धा गेलो होतो. ती वेळ वेगळी होती. राम मंदिराचा मुद्दा कोर्टात होता. आधी मंदिर मग सरकार, आम्ही मोदींना सांगितलं. मोदी म्हणाले आता नको. आता हे टिकोजी राव फणा काढतोय. हे रामभक्त असते तर सुरतला नाही तर अयोध्येला गेले असते. आताचे उपमुख्यमंत्री आधी कधी अयोध्येला गेले नाहीत. माझा शर्ट अधिक भगवा दाखवण्यासाठी गेले,' अशी टीका उद्धव ठाकरेंनी  फडणवीस यांच्यावर केली.

उद्धव ठाकरे यांनी आपल्या भाषणात मुख्यमंत्री एकनाथ शिंदे यांच्यावर जोरदार टीका केली. कोरोना काळात मी घरातून काम केले. त्यावरून विरोधक टीका करत असतात. मी घरातून काम केलं तरी लोकांच्या सहकार्याने आपण कोरोनाचा मुकाबला केला. काम करायची इच्छा असेल तर कुठूनही करता येते. वणवण फिरले म्हणजे खूप काम केलं असं नसते अशा कानपिचक्याही उद्धव ठाकरे यांनी दिल्या. 'उलट्या पायाचं सरकार आलं आणि सतत गारपीट होत आहे. हे सरकार अवकाळी आहे अशी टीका ठाकरे यांनी केली.

भाजपच हिंदुत्व गोमूत्रधारी