मुख्यमंत्र्यांसोबत उद्योग मंंत्री, खासदार, माजी खासदार, एमएसआरडीसीचे अधिकारी, ओएसडी, उपमुख्यमंत्र्यांचे ओसडी आदी ज्यांना गुवाहाटीला नेता आले नाही, अशा लोकांना दावोसला घेऊन जात आहेत, असा खोचक टोला ठाकरेंनी लगावला. केंद्र सरकारचा यावर अंकूश नाही. दलालांसह बिनकामांची ५ ते ६ लोक दौऱ्यात आहेत. विशेष म्हणजे ५० लोकांत कोणीही बिझनेसमेन नाही. त्यामुळे हा खर्च स्वतः करणार असले तरी परराष्ट्र व्यवहार मंत्रालयाला याची माहिती आहे का, अशा प्रश्नांची सरबत्ती केली. या दौऱ्यात सर्वसामान्यांचा पैसा वाया जात असल्याचा आरोप ठाकरेंनी करत, दावोस आणि रेसकोर्सवर भाजपने यावर भूमिका स्पष्ट करावी मागणी केली. 

मोठी गुंतवणूक राज्यात आणू - मंत्री उदय सामंत 

दावोसला जाणारे शिष्टमंडळ मोठे असले तरी खर्च कमी आहे. एकाही पैशाचा अपवव्यय होणार नाही. उलट मोठी गुंतवणूक मुख्यमंत्री राज्यात आणतील, असा खुलासा उद्योग मंत्री उदय सामंत यांनी केला. लंडनला वाघ नख आणण्यासाठी गेल्यानंतर ही दिशाभूल करण्याचा प्रयत्न काहींनी केल्याचा टोला सामंत यांनी आदित्य ठाकरेंना लगावला. मागील सरकारच्या काळात दावोसमध्ये उद्योग मंत्र्यांसह पर्यटन मंत्री, त्यांचा ओसडी गेले. ५० हजार कोटींचा करार केला. तो करार आणि उद्योजक कुठे सापडत नसल्याचा खोचक चिमटा काढला. सुप्रसिध्द उद्योगपती मुकेश अंबानी यांच्या बंगल्याजवळ बॉम्ब ठेवलेला सचिन वाजेला पोलीस सेवेत कोणी घेतले, असे प्रश्न उपस्थित केले. अदानीवरून सामंत यांनी आदित्य ठाकरेंवर टीकेची झोड उठवली.